Na
Eric Mayo be de guyman wey score de goal wey mark bus stop for de
Golden Eaglets of Naija to take alternative route enter 3rd place match
of African U17 Championship instead of de final. Na dat one goal de
Amajimbos of Southy use kpokpo Naija.
Naso de two teams take start de match wit fire for fire as notin really consine dem wit defense, dem just wan attack.
Sharp
sharp for inside early mormor of de match na hin Southy don dey knock
ontop goalie keeper Akpan Udoh door wey hin no gree open for dem.
Naija sef no dull as Suleiman Abdullahi sef budey hin own shot but e no enter.
For inside 11 minute, Victor Osimhen get awoof chance to score but de guyman too slow for post front naso hin dull hinsef.
Osimhen
still get anoda chance five minute later, hin try dis time but de
goalie keeper Mondli Mpoto show am say hin no carry mat come sleep for
post.
Mpoto let Naija know say dem go need follow Amadioha yarn ontop hin mata befor dem go fit score as save Okonkwo chance again.
Na
for inside 26 minute de horror film wey all Naija pikin bin dey fear to
watch happen o as Mayo find beta place for post keep de ball and Southy
lead 1-kondo.
As e remain 5 minutes make first
half pack load comot naso Kelechi Nwakali and Osimhen start to dey show
Mpoto hard time but de goalie tanda gidigba save all dem ball.
Naso de Amajimbos take finish first half as oga boss.
As 2nd half begin Mpoto na still dat winchy for Naija o as hin let any ball still pass am for post.
Naso Southy just dey gather confido dey go for inside de match like garri inside water wey dey swell.
Golden
Eaglets coachie Emmanuel Amuneke sha later think say na anoda attacker
go make de game gel wella naso hin talk say make Christian Charles wear
jersey enter match.
When e remain 13 minutes make match finish naso Chukwueze Samuel throway one-on-one wey Naija suppose use equalise.
De
guyman get anoda chance o. Dis time hin mumu 3 defenders but hin no fit
finish wetin hin start has hin fire de ball hit anoda defender.
Na
all way Golden Eaglets try to get equaliser but Mpoto just do strong
head through out, even when Osimhen try hin bicycle kick..
By Bayo Psalm
About the writer: He is an undergraduate based in Ilorin, Kwara State.
No comments:
Post a Comment